O MEU DICIONARIO GALEGO

Os nenos e nenas do 1° ciclo de Primaria remataron a elaboración do seu primeiro dicionario en galego, un traballo cheo de ilusión, aprendizaxe e descubrimentos.

Queremos felicitalos polo magnífico labor realizado e agradecerlles a súa curiosidade e as ganas de seguir aprendendo cada día. Grazas por interesarvos polas palabras, polos seus significados e por facer do galego unha ferramenta de comunicación presente no voso día a día. 

Este dicionario é o reflexo do voso esforzo, da vosa creatividade e do cariño co que empregades e coidades a nosa lingua. Estamos moi orgullosos de vós e animámosvos a seguir descubrindo, creando e compartindo palabras en galego.

E isto non remata aquí: o vindeiro curso seguiremos engadindo novas palabras, expresións e descubrimentos. Abofé que si! Porque un dicionario, igual ca a aprendizaxe, medra pouco a pouco grazas ás ganas de saber e de compartir.

Parabéns a todos e todas polo excelente traballo!

O FORMIGUEIRO

Benvidos a O Formigueiro! 🐜

Hoxe temos entre nós unha convidada de auténtico luxo, unha invitada de excepción que non necesita presentación... pero imos facela igual!

Recibimos con moita ilusión a Begoña Caamaño, que vén compartir connosco a súa experiencia, o seu talento e algunha que outra sorpresa. Estamos encantados de tela connosco para coñecer un pouco máis da súa vida, da súa traxectoria e do seu legado. Preparade as antenas, abride ben os ollos e non perdades detalle, porque este programa promete ser tan interesante como divertido. E, como non podía ser doutro xeito, tamén están aquí os nosos colaboradores máis divertidos, Trancas e Barrancas, preparados para facer das súas e sacar algún sorriso durante a entrevista.

📹 Vídeo elaborado polas alumnas Carla Santos Calvete e Candela Esteban Castro, de 4º ESO B, que puxeron todo o seu esforzo, creatividade e entusiasmo para facer posible esta reportaxe e render homenaxe á figura da nosa convidada e homenaxeada.

Agardamos que o desfrutedes. Que comece o espectáculo! 🎬🐜

 

FESTIVAL DE CANS 19-05-2026

As alumnas de 3º da ESO Claudia, Candela, Vera, Julia, Carlota e Sofía viviron onte unha xornada inesquecible como convidadas de excepción no Festival de Cans, tras recibir o premio ao mellor uso da lingua galega polo seu documental: O peso da memoria: o exilio. 

Foi unha mañá chea de emocións e aprendizaxes: desfrutaron dunha masterclass no Baixo de Carlos sobre a inclusión na cinematografía da man de Pablo Romero Fresco, asistiron á visualización das curtas no Baixo de Mucha e compartiron unha fotografía de grupo co director do festival, Alfonso Pato, con Juana Otero e con Valentín García Gómez. 

Para rematar esta experiencia tan especial, xantamos no Torreiro, un lugar único e emblemático que puxo o broche perfecto a unha xornada de excepción. 

Parabéns polo voso talento, compromiso e amor pola lingua galega! 🏆💛💙👏

DÍA DAS LETRAS GALEGAS 18 DE MAIO 2026

 

O luns 18 de maio vivimos un Día das Letras Galegas moi especial no noso centro.

Os maiores convertéronse en padriños e madriñas do alumnado de Educación Infantil, compartindo con eles unha xornada chea de aprendizaxe e emocións. As alumnas de 1º de Bacharelato dramatizaron a figura de Lúa, achegándolles o poder dos nomes galegos e o poder da nosa lingua grazas á figura de Begoña Caamaño.

Ademais, todos e todas desfrutaron de xogos tradicionais e da visita ao museo etnográfico e cultural, onde puideron descubrir e aprender máis sobre a nosa cultura e as nosas raíces. Un día inesquecible para celebrar o orgullo de ser galegos e galegas!

BEGOÑA CAAMAÑO.

Begoña Caamaño non se achega á literatura como quen busca un refuxio cómodo, senón como quen abre unha fiestra para que entre aire novo. Nacida en Vigo, medrou entre palabras coma as da radio, as do activismo cultural, as do compromiso e, foi facendo da comunicación unha forma de entender o mundo e tamén de transformalo.

Durante anos, a súa voz estivo ligada á radio pública galega, onde non só informaba, senón que tamén deixaba entrever unha mirada crítica e feminista pouco habitual nos espazos máis convencionais. Mais había historias que non cabían nos formatos diarios, relatos que precisaban tempo e outra cadencia. Así foi como chegou á narrativa.

Cando publicou Morgana en Esmelle, non parecía unha estrea, senón a continuación natural de todo o que levaba dentro: unha reinterpretación dos mitos desde unha perspectiva nova, máis libre e máis incómoda. A súa escrita tiña algo de reivindicación e algo de poesía, como se cada frase quixese cuestionar o que sempre se dera por feito.

A súa traxectoria foi breve, pero intensa. Marchou cedo demais, deixando a sensación de que quedaban moitas historias por contar. Aínda así, as que deixou seguen abertas, dialogando con quen as le e lembrando que a literatura tamén pode ser un lugar para discutir o mundo e imaxinar outros posibles.

Grazas, Begoña! Seguimos a traballar pola nosa cultura na nosa lingua. 

PREMIOS REC-CURTA 26

Na tarde do venres, 8 de maio, as nosas alumnas Candela, Claudia, Vera e Canela recibiron, de mans de Isabel Valiño, secretaria da Secretaría Xeral de Política Lingüística, e de Alfonso Pato, director do Festival de Cans, os premios ás curtas que presentaron: O corazón da terra, que levou un accésit ás mellores localizacións, e O peso da memoria: o exilio, que acadou o premio ao mellor uso da lingua na secuencia narrativa.

Ademais, polo feito de acadar este galardón, o martes 19 acudirán ao Festival de Cans, onde poderán desfrutar dunha serie de actividades programadas no marco do festival.

SOBREMESAS DO ENTROIDO

Parabéns, rapaces e rapazas de 1º e 4º ESO, polo ben que ides falando en galego e pola soltura e naturalidade que demostrades cada día ao empregalo. Dá gusto escoitarvos expresárdesvos con tanta confianza, facendo da nosa lingua algo vivo e presente en cada momento.

E que mellor maneira de facelo ca na cociña, compartindo risas, aprendizaxes e, por suposto, conquistándonos a todos coas vosas deliciosas sobremesas. Seguide así, porque estades demostrando que o galego sabe —e moi ben!— a traballo en equipo, creatividade e ilusión.

Aí tedes unha pequena mostra do seu excelente traballo!

Isaac Rivera Martínez (1º ESO)

Sofía Conde Riera

AQUÍ TAMÉN SE FALA GALEGO

Os nosos alumnos e alumnas de 1.º de ESO participaron no proxecto “Aquí tamén se fala galego”, unha iniciativa de dinamización e normalización lingüística que naceu no IES Rafael Dieste da Coruña da man dos profesores Arcadio González Novoa e Alberto Pombo.

Esta proposta busca fomentar o uso do galego na contorna máis próxima ao alumnado, como comercios, institucións e espazos públicos, facendo visible a presenza da nosa lingua na vida cotiá e contribuíndo a rachar prexuízos sobre o seu uso. A través da colocación de carteis e adhesivos co lema “Aquí tamén se fala galego” e da realización de actividades creativas e participativas, o alumnado convértese en protagonista activo na defensa e promoción da lingua.

Trátase dunha campaña que medrou de maneira extraordinaria, na que participan centos de centros educativos de toda Galicia, converténdose nunha das maiores accións de dinamización lingüística impulsadas pola mocidade. Ademais, esta iniciativa recibiu importantes recoñecementos no ámbito educativo e cultural polo seu impacto na promoción do galego.

Velaí van algunhas mostras e mirade o ben que se desenvolven xa coa lingua!

CEN ANOS DE HISTORIA

Onte celebramos con orgullo o centenario do noso colexio, un século acompañando xeracións de estudantes na súa formación integral. Durante estes 100 anos, o noso centro construíu un espazo onde cada nena e cada mozo é valorado, apoiado e preparado para afrontar os retos do futuro con confianza e seguridade.

Queremos render unha especial homenaxe ás irmás Concha, Cándida e a todas as que contribuíron a que os valores do colexio se convertesen en realidade. Tamén agradecemos profundamente a confianza das familias e o compromiso do alumnado, do profesorado e de toda a comunidade educativa que fai posible que esta institución siga sendo un referente de educación e cultura.

Grazas tamén ás personalidades e aos representantes das distintas institucións que nos acompañaron nun momento tan emotivo.

Cen anos de historia, de esforzo e de dedicación, que nos enchen de orgullo e responsabilidade para continuar construíndo futuro.

26 SETEMBRO DÍA EUROPEO DAS LINGUAS

 

O 26 de setembro celebramos a sorte de vivir nun continente cheo de linguas, cada unha cunha historia e unha maneira única de mirar o mundo. Mais se hai unha lingua que nos toca máis de preto é o galego, a nosa, a que nos fai ser quen somos. Falar galego non é só comunicarnos: é querernos, é recoñecer que pertencemos a unha comunidade con memoria e futuro. Defender o galego é un acto de autoestima e tamén de responsabilidade, porque se nós non coidamos da nosa lingua, quen o fará? Celebremos hoxe todas as linguas, pero fagámolo lembrando que a nosa tamén merece estar viva, forte e orgullosa.

AQUÍ TAMÉN SE FALA GALEGO

O noso alumnado, desde Primaria ata Bacharelato, participa este curso na campaña “Aquí tamén se fala”, en colaboración co comercio da nosa zona. É unha iniciativa cultural que naceu do Equipo de Dinamización da Lingua Galega do IES Plurilingüe Rafael Dieste (A Coruña), coa colaboración da Secretaría Xeral de Política Lingüística da Xunta de Galicia. Xa son máis de 200 centros de toda Galicia e preto de 50.000 estudantes os que se están sumando!

Agardamos que moitos locais se adhiran a esta proposta grazas ao entusiasmo da nosa rapazada, que se está a implicar de cheo para facelo posible.

En Pi e Margall fálase galego. Así o amosarán os comercios que coloquen o cartel nas súas portas, e así o demostraremos tamén nós, con orgullo e alegría por sermos parte dun eslabón nesa cadea de prestixiar á nosa lingua.

Graciñas! Aquí tamén se fala!

E lembra: “o peor galego é o que non se fala”.

Anímate ti tamén: fala galego, celébrao e compárteo!