PREMIOS REC-CURTA 26

Na tarde do venres, 8 de maio, as nosas alumnas Candela, Claudia, Vera e Canela recibiron, de mans de Isabel Valiño, secretaria da Secretaría Xeral de Política Lingüística, e de Alfonso Pato, director do Festival de Cans, os premios ás curtas que presentaron: O corazón da terra, que levou un accésit ás mellores localizacións, e O peso da memoria: o exilio, que acadou o premio ao mellor uso da lingua na secuencia narrativa.

Ademais, polo feito de acadar este galardón, o martes 19 acudirán ao Festival de Cans, onde poderán desfrutar dunha serie de actividades programadas no marco do festival.

SOBREMESAS DO ENTROIDO

Parabéns, rapaces e rapazas de 1º e 4º ESO, polo ben que ides falando en galego e pola soltura e naturalidade que demostrades cada día ao empregalo. Dá gusto escoitarvos expresárdesvos con tanta confianza, facendo da nosa lingua algo vivo e presente en cada momento.

E que mellor maneira de facelo ca na cociña, compartindo risas, aprendizaxes e, por suposto, conquistándonos a todos coas vosas deliciosas sobremesas. Seguide así, porque estades demostrando que o galego sabe —e moi ben!— a traballo en equipo, creatividade e ilusión.

Aí tedes unha pequena mostra do seu excelente traballo!

Isaac Rivera Martínez (1º ESO)

Sofía Conde Riera

AQUÍ TAMÉN SE FALA GALEGO

Os nosos alumnos e alumnas de 1.º de ESO participaron no proxecto “Aquí tamén se fala galego”, unha iniciativa de dinamización e normalización lingüística que naceu no IES Rafael Dieste da Coruña da man dos profesores Arcadio González Novoa e Alberto Pombo.

Esta proposta busca fomentar o uso do galego na contorna máis próxima ao alumnado, como comercios, institucións e espazos públicos, facendo visible a presenza da nosa lingua na vida cotiá e contribuíndo a rachar prexuízos sobre o seu uso. A través da colocación de carteis e adhesivos co lema “Aquí tamén se fala galego” e da realización de actividades creativas e participativas, o alumnado convértese en protagonista activo na defensa e promoción da lingua.

Trátase dunha campaña que medrou de maneira extraordinaria, na que participan centos de centros educativos de toda Galicia, converténdose nunha das maiores accións de dinamización lingüística impulsadas pola mocidade. Ademais, esta iniciativa recibiu importantes recoñecementos no ámbito educativo e cultural polo seu impacto na promoción do galego.

Velaí van algunhas mostras e mirade o ben que se desenvolven xa coa lingua!

CEN ANOS DE HISTORIA

Onte celebramos con orgullo o centenario do noso colexio, un século acompañando xeracións de estudantes na súa formación integral. Durante estes 100 anos, o noso centro construíu un espazo onde cada nena e cada mozo é valorado, apoiado e preparado para afrontar os retos do futuro con confianza e seguridade.

Queremos render unha especial homenaxe ás irmás Concha, Cándida e a todas as que contribuíron a que os valores do colexio se convertesen en realidade. Tamén agradecemos profundamente a confianza das familias e o compromiso do alumnado, do profesorado e de toda a comunidade educativa que fai posible que esta institución siga sendo un referente de educación e cultura.

Grazas tamén ás personalidades e aos representantes das distintas institucións que nos acompañaron nun momento tan emotivo.

Cen anos de historia, de esforzo e de dedicación, que nos enchen de orgullo e responsabilidade para continuar construíndo futuro.

26 SETEMBRO DÍA EUROPEO DAS LINGUAS

 

O 26 de setembro celebramos a sorte de vivir nun continente cheo de linguas, cada unha cunha historia e unha maneira única de mirar o mundo. Mais se hai unha lingua que nos toca máis de preto é o galego, a nosa, a que nos fai ser quen somos. Falar galego non é só comunicarnos: é querernos, é recoñecer que pertencemos a unha comunidade con memoria e futuro. Defender o galego é un acto de autoestima e tamén de responsabilidade, porque se nós non coidamos da nosa lingua, quen o fará? Celebremos hoxe todas as linguas, pero fagámolo lembrando que a nosa tamén merece estar viva, forte e orgullosa.

AQUÍ TAMÉN SE FALA GALEGO

O noso alumnado, desde Primaria ata Bacharelato, participa este curso na campaña “Aquí tamén se fala”, en colaboración co comercio da nosa zona. É unha iniciativa cultural que naceu do Equipo de Dinamización da Lingua Galega do IES Plurilingüe Rafael Dieste (A Coruña), coa colaboración da Secretaría Xeral de Política Lingüística da Xunta de Galicia. Xa son máis de 200 centros de toda Galicia e preto de 50.000 estudantes os que se están sumando!

Agardamos que moitos locais se adhiran a esta proposta grazas ao entusiasmo da nosa rapazada, que se está a implicar de cheo para facelo posible.

En Pi e Margall fálase galego. Así o amosarán os comercios que coloquen o cartel nas súas portas, e así o demostraremos tamén nós, con orgullo e alegría por sermos parte dun eslabón nesa cadea de prestixiar á nosa lingua.

Graciñas! Aquí tamén se fala!

E lembra: “o peor galego é o que non se fala”.

Anímate ti tamén: fala galego, celébrao e compárteo!

CURSO 25-26

 Moi bos días a todos e todas!

Durante as últimas semanas, o verán regalounos instantes para deternos. Raios de sol que nos encheron de enerxía, noites tranquilas para soñar en grande, aventuras que nos fixeron rir e momentos de calma para simplemente respirar.

Tivemos tempo para descansar, para recargar pilas e mirar a vida desde outro ángulo… e agora, con esa forza renovada, volvemos atopármonos aquí, neste lugar que é moito máis que un colexio: é un espazo onde as ideas crecen, as amizades se fortalecen os retos nos transforman.

Hoxe, damos a benvida a un novo curso, e con el por centos de oportunidades. Oportunidades para descubrir o que somos capaces de facer, para aprender dos nosos acertos e tamén dos nosos erros. Aquí ninguén empeza de cero: todos traemos na mochila o que vivimos, o que aprendemos e a ilusión polo que está por vir.

Non teñamos medo: medo a equivocarnos, medo a preguntar, medo a tentar algo novo. Porque cada paso —mesmo os que parecen pequenos— achéganos a converternos na mellor versión de nós mesmos.

Este curso é como mergullarse nun mar novo. O verán foi a beira na que tomamos aire, na que loitamos contra o lume… e agora é o momento de zambullirnos sen reservas, de nadar con curiosidade, de explorar cada recuncho do coñecemento e de compartir a viaxe con quen nos rodea.

Así que, respiremos xuntos, levantemos a mirada e démoslle a benvida a este novo curso que promete ser tan intenso como inesquecible e no que cumprimos cen anos!

Benvidos e benvidas ao curso 2025–2026! Que empece a aventura!

BO DESCANSO ESTIVAL PARA TODOS!

BO VERÁN!

 

Galardóns do certame audiovisual Rec.curta 25

 

Carmen

O día, 9 de maio tivo lugar a entrega dos galardóns do certame audiovisual Rec.Curta ao que se presentaron unha decena de traballos que optaban ás dúas categorías das que consta o certame. Primeira, dirixida a alumnado de 6ª de Primaria, 1º e 2º de ESO e segunda dirixida 3º, 4º ESO, Bacharelato e FP. O traballo recoñecido como Mellor docu-ficción da primeira categoría foi Carmen, baseado nunha historia real de emigración galega, elaborado por tres alumnas do colexio Inmaculada (carmelitas de Vigo) e na 2ª categoría, o xurado decidiu recoñecer como Mellor curta O eco do silencio, que xira ao redor do acoso escolar, da Inmaculada de Marín e como Mellor docu-ficción a Estrobo F, centrada na importancia de coidar a nosa contorna e o medio ambiente, realizada por alumnado do colexio María Assumpta de Noia.

Ademais, o seu traballo foi recoñecido e subido ao Portal da lingua logo de recibir os parabéns de Valentín García Gómez, secretario xeral da Lingua da Consellería de cultura, lingua e xuventude así como de Alfonso Pato, director do Festival de Cans.

 

🏛️ Visita a Pontevedra: Un paseo pola historia da cidade do Lérez

O xoves 10 de abril, os alumnos de 2º da ESO realizamos unha saída didáctica para coñecer mellor a cidade do Lérez, Pontevedra, acompañados por Raquel, unha boa amiga e excelente guía que sempre nos contaxia o seu amor por esta cidade fermosa, chea de historia, cultura e encanto.

Comezamos o noso paseo saíndo do Museo de Pontevedra, mentres un dos dous grupos nos que nos dividimos accedía ao seu interior. O outro grupo iniciamos un percorrido pola zona antiga da cidade, que destaca, alén do evidente valor dos seus monumentos, pola súa beleza arquitectónica: un conxunto harmonioso de pedra, repleto de casas nobres blasonadas, soportais e prazas vivas e acolledoras.

Durante o camiño polas prazas de Pontevedra, Raquel explicounos a importancia da Basílica de Santa María A Maior, situada nun dos puntos máis elevados da cidade. Construída no século XVI, foi financiada polo gremio dos mareantes, cuxo barrio, A Moureira, se estendía ao pé da súa fachada sur, unha marabilla plateresca moi representativa.

Continuamos pola rúa Isabel II ata a Praza do Teucro, chamada así en honra ao mítico fundador grego da cidade. Alí detivémonos a admirar pazos barrocos do século XVIII, como o de Gago, Montenegro, o do conde de San Román ou o de Pita. Seguimos visitando as prazas de Curros Enríquez e Méndez Núñez, onde puidemos apreciar as pegadas da nobreza na arquitectura das súas casas.

O paseo levounos polas rúas labirínticas do centro histórico, evocadoras e especialmente fermosas pola noite, que se abren en prazas con nomes ligados á súa antiga función comercial: a Praza da Verdura, onde aínda se mantén o mercado, ou a Praza da Leña, cun cruceiro no centro, soportais, galerías e casas de boa cantería que forman unha das postais máis emblemáticas da cidade.

Neste último lugar está o Museo de Pontevedra, onde realizamos o intercambio de grupo. Logo dunha pequena pausa, entramos ao museo guiados por Paula, quen nos acompañou por unha interesante viaxe pola arte e a historia: desde a sala funeraria ata as obras máis destacadas como o Retablo de Belvís, a Virxe Branca ou a arte galega medieval. A visita rematou na sala de Castelao, unha parada moi especial, xa que este ano se conmemoran os 75 anos do seu pasamento.

Xa fóra do museo, continuamos cara á Praza da Ferrería, organizada ao redor dunha fermosa fonte do século XVI. Este espazo aberto inclúe tamén a Praza da Estrela e os Xardíns de Casto San Pedro, auténtico corazón da cidade, lugar de lecer e celebracións.

Nesta zona destaca o convento de San Francisco, con igrexa gótica de máis de cen metros, cun gran rosetón na fachada e tumbas de pontevedreses ilustres. Tamén visitamos a Igrexa da Peregrina, símbolo da cidade, construída en forma de vieira a finais do século XVIII e situada xunto ao Camiño Portugués a Compostela.

Finalmente, rematamos a ruta regresando ao Museo, onde pechamos esta xornada cultural que nos permitiu coñecer mellor a nosa historia, o noso patrimonio e o valor dunha cidade que sabe conservar o seu pasado con orgullo.

📚 Un día diferente, cheo de aprendizaxes e cultura, que nos axudou a entender un pouco máis quen somos a través das pedras e prazas dunha cidade que fala por si soa: Pontevedra.

VISITA DE MIGUEL ANXO ALONSO DÍZ

Querido Miguel Anxo Alonso Diz,

Os alumnos de 1º ESO queremos agradecerche profundamente por estas dúas horas tan especiais que compartimos contigo. Foron momentos hipnóticos, nos que, tanto cativos como maiores, tivemos a oportunidade de aprender de primeira man o fermoso oficio de ser escritor. A túa xenerosidade, a paciencia e o cariño con que asinaches cada un dos libros das nosas rapazas e rapaces fixeron que a experiencia fose aínda máis máxica.

Grazas por dedicar o teu tempo a nós, por transmitir a túa paixón e por facernos sentir parte deste mundo tan fascinante da literatura.

Con cariño e gratitude,